Assam-ah ILP hman phutna lantir dawn

Asom Jatiyatabadi Yuba Chatra Parishad (AJYCP) chuan kumin March thla  hian Delhi-ah Citizenship Amendment Act (CAA) duh lohna leh, Assam-a inner line permit (ILP) system hman phutna lantir an tum. 

AJYCP hian kum liam ta aṭang khan Assam-a ILP system hman phutna hi a thar thawh leh a ni. An pawl president, Rana Pratap Barua chuan Delhi-a an hun hman ni tur tak chu an la tifel lo tih a sawi a, mahse March thla chhung ngeia neih an tum tih a sawi. 

January 9 hian state chhunga district hrang hrang leh, sub-divisional headquarters-ah CAA dodalna leh ILP system phutin sit-in protest huaihawt an tum bawk. Hei bakah hian January 27-ah district hrang hranga hmun 500-ah hemi pahnih chungchang sawiin street meeting buatsaih an tum bawk a ni. 

AJYCP general sec­retary Palash Changmai chuan ILP system hi hman a nih chuan, CAA in an state-a nghawng ṭha lo a neih tur leh, dan loa ram dang mi luh tur tam tak chu a veng thei dawn a ni, a ti. Assam leilung fa dik takte venhim an nih theihna turin an pawl chuan hun rei tak ILP system hman hi a lo phut tawh a ni, tiin a sawi. 

An thil phut pahnih chungchangah hian sorkar laipui a inrawlh a ngai a, hei vang hian centre lama thuneitute nawrna atan Delhi khawpuiah nawrh huaihawt hi an tum tih Changmai chuan a sawi. National party hruaitute pawh biak an tum thu leh, an thil phut nawrna tur hian state chhunga political leader-te pawh thawhpui an tum tih a sawi bawk.