Assam-ah scholarship fund tichingpentu 32 man tawh

Assam-a Criminal Investigatioin Department (CID) chuan kum hnih liam ta chhunga minority student tana pre-matric scholarship fund, cheng vaibelchhe 10 tichingpentu zinga pahnih an man belh leh a, anni pahnih nen hian district pali aṭangin mi 32 man an ni tawh a ni. 

Police thupuangtu chuan CID hian police-te puihnain Kampur district-a Nagarbera leh Boko hmun an dap a, hetah hian sum tihchingpennaa inhnamhnawiha puh mi pahnih hi an man leh tih a sawi. An mi man zinga pakhat hi sumdawng niin IT centre pawh a nei a, pakhat dang hi an middleman a ni thung. Fund tihchingpennaa inhnamhnawiha puha man tawh mi 32 zingah hian headmaster, zirtirtu,  nationalised bank-a Customer Service Point ( CSP) neitu, school management committee president, electronic data processor-te bakah middlemen 12 an tel. An zinga mi, Goalpara district mi Robiul Ilsam chu sum tihchingpenna a bultumtu ber nia ngaiha ni. 

CID hian hmun hrang hrang an dapna aṭangin laptop pathum, zirlai thlalak 217, students' certificate 104, pre-matric scholarship form 173 leh bank passbook 11 an man tawh bawk.