Venhimna hnuaiah Truck leh oil tanker-te'n Imphal an thleng

Hun rei tak chhung United Naga Council (UNC)-te'n National Highway 37 an dan avanga bung-raw phur truck leh tanker-te'n Manipur an luh theih loh hnuah, Nilaini khan venhimna hnuaiah Imphal thlenpui an ni leh ta.

Tanker 100 vel leh truck 299 zet chu India Reserve Battalion leh Manipur Police commando-te escort-na hnuaiah Imphal hi hruai thlen an ni. Hetih lai hian truck 1,500 vel chu Assam, Nagaland leh Manipur ramri-ah te an la tangkhang a ni. Manipur Consumer Affairs, Food and Public Distribution Minister K. Biren chuan Assam sorkar chu an harsatna tawh mekah ṭanpui turin an ngen tih a sawi a, Assam chhunga truck tangkhang eng emaw zat chu venhimna pek an ngai tih a sawi. Biren chuan venhimnna hnuaiah truck leh tanker-te chu Manipur hruai thleng turin hma lak mek a ni, a ti bawk.

Hetih lai hian petrol pump-te chu khar a la ni a, hun reiloteah hawn theih beisei a ni. Chief Minister Okram Ibobi Singh chuan, UNC aiawh te nawrh titawp tur hian Thawhlehni khan Delhi-ah sorkar laipui aiawhten inbiakna an neihpui thu sawiin, ziaka sawmna an dawn loh avangin Manipur sorkar erawh a tel lo a ni, a ti. UNC-te chuan state sorkarin inbiakna nei tura a rawtna chu an pawm lo tih a sawi bawk.

United Naga Council (UNC) chuan Manipur sorkarin Sadar Hills leh Jiribam-te district puitlingah hlankai a tum duh lohna lantir a, NH 37 an dan mek chu kalpui zel an tum thu an sawi. He thu hi New Delhi-a Ministry of Home Affairs (MHA) Joint Secretary, Satyendra Garg leh UNC aiawhin mi paruk ten inbiakna an neih hnua an thuchhuah a ni. Inbiaknaah hian Manipur Chief Secretary leh Special Secretary in-charge of Home-te chu tel tura beisei ni mah se an tel lo thung. UNC president Gaidon Kamei chuan an thil phut a hlawhtlin hma chuan a tawp thlenga beih zel an tum thu a sawi. UNC president chuan Manipur CM Ibobi-a kaihhruai sorkar hnuaiah mipuiten harsatna an tawh mek thu a sawi.

Zeliangrong Youth Front (ZYF) chuan Manipur sorkar chu Sadar Hills leh Jiribam-te district puitlingah hlang kai lo turin an phut tih an sawi ve leh. ZYF-te chuan district pek chungchanga state sorkarin hma a lakna chu tawpsan tura an phut thu sawiin, tehna hrang hrangah Sadar Hills leh Jiribam-te chuan district an tlin lo a ni, an ti.