Zirlaiten rel kawng an dang Hmarchhak rel service a nghawng

Tribal zirlai North Cachar Hill Indigenous Students Forum (NCHISF)-te'n Assam-a Dima Hasao district-ah rel kawng an dan avangin hmarchhak huamchhungah rel service a khaihlak tih Northeast Frontier Railway (NFR) chuan an tarlang.

Rel kawng dan a nih avang hian a bikin Tripura, Mizoram, Manipur leh southern Assam-ah rel service a buai phah. NFR chuan Lumding-Badarpur hill section service chu an titawp lailawk tih an sawi. North Cachar Hill Indigenous Students Forum (NCHISF) hian kum 2014-15 chhunga rel kawng siamin mi mal in leh lo a tichhhiatte hnenah NFR chu zángnadawmna pe tura phutin, tunkar Thawhlehni zing aṭang khan Dima Hasao district headquarters, Haflong-ah rel kawngpui dan hi an kalpui ṭan a ni.

Dima Hasao district Deputy Commissioner Sonaram Khanikar chuan Thawhlehni khan Haflong-ah NCHISF aiawh, railway official leh district headquarter aiawhte meeting a neihpui. NFR official-te chuan ni 15 chhunga ram neitute hnena zángnadawmna pek an tiam theih loh avangin zirlai pawlte hian rel kawng dan hi an kalpui ta a ni. Hetih lai hian railway official lam chuan zángnadawmna pe chhuak turin thla li vel an mamawh dawn niin Khanikar chuan a sawi.

NCHISF President David Kevom chuan chhungkaw 500 te ram, hectre 300-a zau chu rel kawng siam hian a tichhia tih sawiin, NFR-te chuan zángnadawmna pek an tiam a, mahse tun thlengin pek an la ni lo, a ti. Hetih lai hian NFR official-te chuan zángnadawmna pek tur atan hian railway authority chuan cheng vaibelchhe 55 a pe chhuak tawh tih sawiin, hei hian a daih loh avangin vaibelchhe 3-5 vel dilbelh leh mek a ni, an ti.

NFR Chief Public Relations Officer Pranav Jyoti Sharma chuan rel kawng dan a nih avang hian Guwahati-Silchar, Silchar-Guwahati bakah, Sealdah-Silchar Kanchenjunga Express leh Agartala-Sealdah Kanchenjunga Express-te chu tihtawp lailawk a nih thu a sawi. Guwahati-Silchar rel kawng dan hian Cachar, Karimganj, Hailakandi leh Dima bakah, hmarchhak state Tripura, Manipur leh Mizoram te a nghawng a ni, a ti bawk.