Army Chief-in Assam regiment 'Colour Presentation Parade' hmanpui

Indian Army Chief, General Dalbir Singh chuan Assam Regimental Centre, Shillong-a infantry battalion thar pali lawmluhna inkhawm 'Colour Presentation Parade' a hmanpui.

Batallion lawm luh thar te hi 16 leh 17 Assam Regiment an ni a, anni bakah hian 1 leh 2 Arunachal Scouts-te an ni. General Dalbir Singh chuan, “Assam Regiment chu Indian Army-a regiment hlun leh an hnathawh ṭhat avanga mite hriat hlawh an ni, an lakah hian ram mipuiten beiseina sang tak kan nei. An hnathawh ṭhat te chhunzawm zel thei turin duhsakna ka hlan a ni" a ti. Assam Regiment hi Assam
ṭhendarh a nih hma, June 15, 1941 khan Shillong-ah bulṭan a lo ni tawh a, tunah hian platinum jubilee an lawm mek a ni.

Assam regiment-te hian Japan-in India a run khan nasa takin an lo bei let a, Jessami leh Kohima inbeihna thlengah khan a phusa ber zinga mi an nih thu defence thupuangtu Amit Mahajan chuan sawi. Inbeih­na ṭum rukah hnehna chang tawhin, Indopui II-na hun lai khan, ṭhenawm ram Myanmar chu nawrletin, kum 1947-48 leh 1971-a Jammu and Kashmir leh Chhamb-a indonaah te hnehna an lo chang tawh bawk. India-in zalenna a neih hnuah, ram leh ram indonaah an la tel vek a, Indian Peace-Keeping Force (IPKF), Sri Lanka leh UN Peace Keeping Force, Cambodia-ah te an mi leh sa an thawhchhuak bawk.

Assam regiment hian regular unit 15 nei mekin, Rashtriya Rifles unit pathum, infantry battalion pathum, Territorial Army-ah ecological battalion pahnih leh Arunachal Scouts-ah battalion pahnih a nei. Khawvela battlefield sang ber Siachen Glacier-ah pawh indo an lo hmachhawn tawh bawk. Heng bakah hian kumin Republic Day leh Army Day-ah te 'best marching contingent' atan thlan an ni.

Shillong-a 'Colour Presen­tation Parade' neih hi Deputy Chief of the Army staff, Assam Regiment leh Arunachal Scouts Colonel Commandant ni bawk Lt. Gen. Subrata Saha chuan a hman pui a, a ni bakah hian Eastern Command chief Lt. Gen. Praveen Bakshi, Central Command chief, Lt. Gen. B.S. Negi-te an tel bawk.