Arunachal Pradesh : Hydropower project hrang hrang thawk mek

Arunachal chief minister Pema Khandu chuan Thawhṭanni khan state pumah hydropower project eng emaw zat, MW 18,000 siam chhuah theihna tur chu thawh mek a ni tih a sawi. Project zingah hian Dibang project pawh a tel.

Chief Minister chuan heng project-te hi zawh fel a nih hunah chuan state tan kumtin Rs vbc 10,000 a siam chhuak thei dawn tih Lower Dibang Valley district Roing-a kumtina neih ṭhin Solung festival a hmanpui zawhah a sawi. Kum lo awm turah Roing leh Lower Dibang Valley chuan hmasawnna nasa tak an nei dawn a ni, a ti.

CM chuan MW 2,880 siam chhuak thei multi-purpose hydroelectric project chuan economy leh infrastructure ṭhanlenna kawngah a pui dawn tih sawiin, state-a sum lak luhna tur a ti pung dawn tih a sawi. Hydropower aṭanga an sum lak luhte chu hmasawnna leh hamṭhatna chak zawka kalpui theihna tur a nih thu tarlangin, Arunachal Pradesh chu kum 2047-ah chuan state intodelh tak an ni tawh dawn tih a sawi.

Khandu hian Lower Dibang valley-a hmasawnna hna thawh tur eng emaw zat lungphum a phum a, Sissiri luia lei dawh mek pawh a tlawh bawk. He lei hi dawh zawh a nih hunah chuan Bizari, Anpum, Loklung leh Palgam khuaten an hmnag ṭangkai dawn tih a tarlang. Dibang Hydroelectric project thawhna hmun a tlawh bawk a, chief managing director S.K. Singh-a kaihhruai National Hydroelectric Power Corporation (NHPC) official-te nen inbiakna an nei bawk.