Manipur : Zirlai naupang 70 chuang damloh vangin sikul khar

Manipur-a Teng­noupal district-a Sita Government High School zirlai naupang 70 chuang an damloh avangin sikul khar a ni a, Teacher's Day lawm hun tur pawh sawn hlat a ni. Zirlai naupangte hi typhoid emaw, boruak inthlak aṭanga natna an kai emaw, rulhut emaw vanga damlo an nih rin a ni a, zirlai nu leh pate an mangan bakah, thingtlang lama hriselna infrastructure dinhmun chungchangah ngaihtuahna a ti thui hle.

Zirlai naupang damlo te hi Primary Health Centre (PHC)-ah enkawl tura hruai an ni a, khum leh facility indaih lohna avangin naupang ṭhenkhat chu in lama enkawl chhunzawm tura tih an ni. Hemi chungchangah hian Kuki Students’ Organisation (KSO) leh School Management and Development Committee (SMDC) ṭangkawp chuan Chief Medical Officer (CMO) hnenah nimin khan ngenna siamin, medical team-te chu medical camp a thlawna buatsaih turin an ngen a, sikul huamchhungah thosi kap turin an ngen bawk.

KSO district education secretary Mimin Mate chuan zirlai naupang 70 chuang an damlo chu ngaihthah chi a ni lo tih sawiin, damdawi lam enkawlna bakah thosi pian theihna hmun tihfai a pawimawh thu a sawi. Khawtlang hruaitute leh nu leh pate chuan damdawi lam enkawlna ṭha dawn vat a nih loh chuan an dinhmunin zual lam a pan dawn tih an sawi bawk a ni.

Hriselna lama mithiamte chuan he thil thleng vang hian hriselna uluk taka enthlithlai a ṭul tih sawiin, hri leng tur venna atan nasa taka hmalak a pawimawh tih an sawi. Sita Government High School chu boruakin ziaawm lam a pan hma loh chuan khar a ni dawn a ni.