Meghalaya : Police-in ruihhlo hmangtute beih titawp turin mipui ngen

Meghalaya-a East Khasi Hills superintendent of police (SP) Vivek Syiem chuan mipui leh khawtlanga pawl hrang hrangte chu ruihhlo hmangsual nia rinhlelhte kutthlak mai ṭhin lo turin a ngen a, hetianga chet hi dan kalh a nih thu leh eng rah ṭha mah a chhuah loh thu a sawi.

Ruihhlo hmang sual nia rinhlelh mi tu tih hriat lohin an tibuai lai video social media-a thehdarh a nih hnuah SP hian thuchhuah hi a siam a ni. He thil thleng hian khawtlangah inhnialna a thlen nasa hle a, thuneitute chuan pawikhawihtute leh pawikhawihna thlenna hmun hriatchhuah tumin hma an la mek a ni. Hriat chhuah an nih hunah an chungah zahngaihna lantir a ni dawn lo tih SP chuan a sawi.

SP chuan ruihhlo khawih chu thil pawi tak a nih thu a sawi rualin, kutthlak ringawt chu chinfel dan tur a ni lo, a ti. Ruihhlo hmangsualte beih chuan buaina chauh a thlen dawn a, dan kengkawhtute leh hriselna lama mithiamte tan hmalak a ti harsa zawk dawn a ni tiin a sawi bawk.

Ruihhlo ngaite kutthlak hian mipui hriselna atan nghawng ṭha lo tak a nei thei tih sawiin, SP chuan HIV vei a tipung thei tih a tarlang. Hei bakah ruihhlo hmangtute an inthup phahin, syringe sem chhuah leh damdawi lam thiamten an buaipuina thlengin a hlawhtlin loh phah thei tih a sawi.