Assam-ah electoral roll ennawn mek

National Electoral Roll Purification and Authentication Programme (NERPAP) hnuaiah Assam chuan electoral roll a ennawn mek a, hming dik lo tihdik a nih bakah vote nei tharte hming belh a ni bawk.

Assam-ah hian khua leh tui ni lo vote nei ṭhahnem tak an awm avangin electoral ennawn hian sawi hlawh hle a, tun hnai khan Gauhati High Court pawhin Foreigners’ Tribunals thutlukna angin khua leh tui dik ni lo, Assam-a pemlut vote neite chu electoral roll aṭanga paih turin thuchhuah a siam a ni.

Electoral roll ennawn mekah Kamrup (Metro) district-ah hming 40,000 paih tawh a ni a, hming ziah dik loh 29,000 tihdik a ni tawh bawk.

District Election Officer Chin­moy Phukan chuan electoral roll aṭanga an paihte chu mitthi tawh leh hmun danga pem chhuakte an ni, a ti a, ṭhenkhat chu pasal an neih avanga an awmna hmun danglam tate an ni, a ti.

Bangladesh aṭanga pemlutte'n electoral roll-ah Guwahati address-a tarlangin vote an siam nia sawi chungchangah, Phukan chuan hemi chungchang hi an enfiah thu leh thu dik lo a nih thu a sawi a, mahse mi ṭhenkhat address tarlan chu tuna an awmna nen a inmil loh thu an a dik lo chu an tihdik nghal zel thu a sawi.

Electoral roll aṭanga hming paih turte chu Foreigners’ Tribunal-in India khua leh tui an ni lo tia a puan hnuah chauh paih theih an ni, a ti a, Bangladesh mi pemlut nia an rinhlelh vang ringawtin electoral roll aṭanga an paih theih loh thu a sawi.

Election Commission chuan March 3 khan National Elec­toral Rolls Purification and Authen­tication Programme hi a tlangzarh a, programme hnuaiah hian electoral roll tihdikna neih a nih bakah voters te EPIC chu Aadhar card nena tihmil tum a ni.