Insawifiah turin sorkar laipui a phut Inkahhai chhunzawm turin NSCN (K) ngen tum

Nationalist Socialist Council of Nagaland (Reformation) chuan Indian Army te'n Mani­pur, Tamenglong-a an member an kahhlum chung­­changah insawifiah turin sorkar laipui a phut.

Khaplang-a kaihhruai NSCN (K) pawl chhuak, NSCN (R) hian an mi leh sa kahhlum a nih chung­changah sorkar laipui chu NSCN (R) bei tura thu petu a ni em tih sawifiah turin a ngen a ni.

NSCN (R) thuchhuak chuan an mi leh sa, Cor­poral Ningailung chu an member pakhat zawng tura a chhuah laiin kahhlum a ni tih a tarlang a, Indian Army te'n NSCN (K) hel tia an sawi chu thu dik a nih loh thu NSCN (R) mi leh sa ngei a nih thu a tarlang.

NSCN (R) thuchhuak chuan sorkar security force te chu NSCN (R), NSCN (K) leh NSCN (IM) helte hre hrang loah a puh a, security force te chuan Naga helte leh India indona angah an ngai a ni, hei vang hian inkahhai thuthlung pawh an zah lo a ni, a ti.

NSCN (K) hotu SS Khaplang chuan kumin March thla khan Wangtin Naga leh P. Tikhak te chu an pawl aṭangin a hnawt­chhuak a, Wangtin leh Ti­­khak te hian NSCN (R) an din hnuah sorkar laipui chu inkahhai thu­thlung a ziahpui ngal bawk.

Hetilai hian Nagaland sorkar chuan inkahhai thu­thlung ziak leh turin NSCN (K) chairman SS Khap­lang ngen a tum.

Nagaland sorkar chuan NSCN (K) be tur­in Naga Hoho leh Eas­tern Nagaland Public Or­ganization (ENPO) chu palai tir turin a ngen a ni.