Pawikhawihnaah security force 187 inhnamhnawih: Gaikhangam

Manipur Deputy Chief Minister Gaikhangam chuan pawl hrang hranga security force 187 chu state chhunga pawikhawihnaah an inhnamhnawih thu Thawhṭanni khan assembly in­khawmah a sawi.

Home portfolio changtu Gaikha­ngam chuan mi 187 zinga pasarih chu pawi­khawihnaa hian thiam loh chantir an nih thu leh an hna aṭanga ban an nih thu a sawi bawk. Security force pawikhawihnaa inhnamhnawih ṭhenkhat chu suspend an ni bawk.

Centre for Organisation Research and Education (CORE) chuan tun hnaia report a tihchhuahah Manipur police te chu discipline leh an hnathawhah an tlak hniam thu a tarlang a, ṭhenkhat chu pawikhawihna lian tham tak takahte an inhnamhnawih a ni, a ti.

Police Department hnuaia awm- Traffic Police, India Reserve Battalion (IRB) leh Manipur Village Defence Force (VDF) te chu thamna, inruk bo, cyber crime, tualthahna leh eiruknaa inhnamhnawih tam zual an ni, tiin report chuan a tarlang.

Kumin June thla chhung khan vawi sarih zet Manipur Police personnel te pawikhawihna chungchang tualchhung chanchinbuah a lang a, ṭhenkhat chu dan phal loha silai hmehpuah thubuaite a ni.

CORE report chuan Manipur police zingah ruihhlo laka fihlim lo leh zu ngawlvei an tam thu tualchhuang media te'n an tarlang fo tih a tarlang bawk a, hetiang thil hian khawtlangah police hmel a tibal ṭhin a ni, a ti.