Assam : CAA hnuaiah khua leh tui nihna mi pathum hnenah pe

Assam chief minister Himanta Biswa Sarma chuan Nilaini khan Citizenship Amendment Act (CAA) hnuaiah ram pawn lam mi pathum chu India khua leh tui nihna pek an ni tih a sawi.

CM Sarma chuan thuthar lakhawmtute a kawmnaah hei hi sawiin, state sorkarin CAA hnuaiah khua leh tui nihna diltu 12 chauh a dawng tih sawiin, heng zinga pathum chu pek an ni tawh a, a dang pakua pawh ngaihtuah mek a ni, a ti. Khua leh tui nihna pekte hi an nihna kimchang erawh a sawilang lo.

Chief Minister chuan CAA dodaltuten a hmaa he dan hmang chungchanga hlauhthawnna an siamte chu hnawlin, Assam-a khua leh tui nihna dil theihna chu a tlem hle tih a tarlang. Assam-ah hian mi nuai 20-25 vel khua leh tui nihna pek an ni dawn tih thuthang awm pawh a dik lo tih sawiin, tun dinhmunah pawh dilna thehluttu 12 chauh an awm tih a tarlang.

August 2024 khan kum 50 mi, Dulon Das chu a hmasa berna atan Assam-ah hian CAA hnuaiah India khua leh tui nihna pek a lo ni tawh a, mahse Sarma chuan an nihna diktak a pholang lo thung a ni. CAA hi kum 2019 khan danah siam niin, kum 2014, December 31 hmaa Bangladesh, Pakistan leh Afghanistan aṭanga Muslim ni lo, Hindu, Sikh, Buddhist, Jain, Kristian leh Parsis pem lutte chu kum nga an awm tlin hnuah he dan hmang hian khua leh tui nihna pek theih an ni.

CAA hman ṭan a nih hnuah Assam sorkar chuan ramri police-te chu July 2024 khan Muslim ni lo, kum 2015 hmalama state chhunga inbengbelte chu Foreigner' Tribunal hnenah hlan lo turin a lo hriattir tawh a ni. Chutiang mite chu CAA hnuaiah khua leh tui nihna dil tura hrilh hre turin a lo chah tawh a ni.