Assam : AASU-in MHA thupek an sawisel

All Assam Students' Union (AASU) leh Assam-a pawl hrang hrangte chuan Ministry of Home Affairs (MHA) in thupek a tihchhuah thar hnuaia Bangladesh, Pakistan leh Aghanistan aṭanga Muslim ni lo pem lutte, visa tel loa December 2024 thleng awm phalsak an nihna tur chu sawiselin, he thupek hi Assam huam tel tir lo turin an phut.

AASU president Utpal Sarma chuan Muslim ni lo sakhaw dang zuitu pem lutte tana khua leh tui nihna pek theih hun bithliah pawhsei zel chuan Assam leilung fate dinhmun a tiderthawng zel niin a sawi.

Kum 2019-a CAA pass a nih khan sorkar laipui chuan Muslim ni lo pem lutte khua leh tui pek theihna hun bithliah chu a pawhsei kan lo hlauthawng sa a, thupek thar tihchhuah chuan kan hlauhthawnna chu a takah a rawn chantir ta a ni. Assam leilung fate hian CAA hi kan pawm dawn lo a, kan duh lohna pawh kan lantir leh dawn a ni," tiin Sarma chuan a sawi. CAA leh hun bithlaih 2024 thlenga pawhsei leh chuan Assam Accord, 1085 a kalh a ni tiin a tarlang.

Kum 1979-1985 -a anti-foreigner movement kalpui a nih hnuah Assam Accord hi ziah a ni a, he movement kalpuinaah AASU hi a hmahruaitu an ni. Prime minister Narendra Modi kaihhruai sorkarin CAA an pass khan Assam Accord an palzut chauh ni loin, Assam leilung fate chu Bangladesh Hindu ten an chimbuai theihna turin kawng a hawnsak a, hei hi BJP in khawtlanga inngeih lohna a awmna tura vote a zawnna a ni, a ti.