Sikkim : Telecom service-ah Nepali ṭawng hmang tel dawn

Sorkar laipuia ministry of communication hnuai Department of Telecommunication (DoT) chuan Sikkim-a telecom service-ah state mipui tam berin an hman, Nepali ṭawng hmang tel vek turin a hriattir.

DoT in hriattirna a tihchhuah tharah, Sikkim state-a telecom company awmte chuan an service zawng zawng - IVRS message, SMS leh call center support-ah English leh Hindi bakah Nepali ṭawng an telh vek tur a ni, a ti. Licensed telecom provider-te chu kaihhruaina siam hi ni 30 chhunga hmang nghal tur leh, an awmna bial Local Service Area (LSA) office-ah report theh lut vek turin a ti. Thupek an zawm leh zawm loh uluk taka enfiah vek a ni dawn a, a zawm lote chungthu pawh ngaihtuah a ni dawn tih an tarlang bawk.

Kaihhruaina thar siam hi Sikkim mipui, telecom hmangute tan anmahni ṭawng ngeia service an dawn theihna tura tih a ni a, hei hian thil hriatchian leh hriatthiam tawk loh awm ṭhinte a sukiang thei tura ngaih a ni.