Manipur: Minister hluiin UGC heritage course-ah Manipur ṭawng telh phut

Union minister of state for external affairs and education hlui Dr Rajkumar Ranjan Singh chuan Education Minister hnenah lehkha thawnin, University Grants Commission-in heritage-based curriculum framework a siamah Manipur ṭawng leh culture heritage telh turin a ngen.

September 4-a union minister of education, Dharmendra Pradhan hnena lehkha a thawnah Singh chuan tun hnaia UGC-in Indian heritage leh culture-based course chungchanga kaihhruaina a siamah Manipur ṭawng telh a ni lo chu ngaihtuah tham a nih thu a tarlang. Kaihhruaina thar an siamah Universal Human Values, Vedic Mathematics, Yoga, leh Ayurveda-te telh a nih laiin, Manipur ṭawng leh hnam ziarang zirna telh a ni lo a ni, a ti.

Ministry hnena rawtna a thlenah hian UGC chu heritage program a siam danglamah Manipur khawtlang nun danglam tak, ram tana an thawh hlawkna leh chhuanawmnate tarlan leh chawi lar a nih theihna atan Manipur ṭawng, literature, classical dance, script, leh cultural heritage course-te dah tel turin a ngen.

Singh chuan a rawtna siam ho chu telh an nih chuan hnam inpumkhatna leh mi zawng zawng huapzo a nih dawn mai bakah hnam nunphung (cultural fabric) a tichak bawk ang, a ti.