Arunachal Pradesh : Donyi Polo Airport-ah terminal building thar hawng

Civil aviation minister Ram Mohan Naidu chuan Hollongi-a Donyi Polo Airport-ah terminal building thar hawngin, Arunachal Pradesh leh India aviation sector-a hun chhinchhiah tlak leh pawimawh tak a ni tih a sawi.

Minister chuan chief minister Pema Khandu leh state sorkar bakah sorkar laipui kaihhruaina hnuaiah project chu a hun takah zawh fel a ni tih a sawi bawk a ni.

Hawnna inkhawmah hian passenger-centric facility thar hawn a ni bawk a, chung zingah chuan traveler library scheme, UDAN Yatri Café leh self-help group leh hmeichhe entrepreneur-te thil zawrh theihna hmun pekna, AVASAR programme pawh a tel. Naupang tan bika siam dawr pawh a awm bawk.

Naidu chuan prime minister Narendra Modi kaihhruai sorkarin thlawhtheihna hmanga intlawhpawhna a ngaih pawimawh thu sawiin, kum 11 kal ta chhungin India rama airport, aircraft, leh passenger chu a let hnihin a pung tih a sawi. Kum 2047-ah airport 350 sa hman turin sorkar laipuiin hun rei tak chhung ruahmanna a lo siam tawh thu a sawi a, UDAN regional connectivity scheme hlawhtlinnate a sawilang bawk a ni.

Donyi Polo Airport hi kum 2022 aṭang khan hman ṭan niin, tun dinhmunah passenger 800 an awm thei tawh a, kum khat chhunga passenger an buaipui zat chu nuai 15 velin a pung bawk a ni. IndiGo chuan September 17 aṭangin Delhi-a nitin service a tipung dawn a, airport hi Guwahati, Kolkata, leh Tezu-te nen pawh thlunzawm a ni tawh.

Naidu chuan sorkarin hmarchhak bialah intlawhpawhna thuam chak a ngaih pawimawh thu sawiin, Pasighat, Tezu, leh Ziro-ah airport sak mek a ni, a ti. Arunachal Pradesh huam chhunga heliport-te nen inthlunzawmna tihzauh tum mek a ni tih a tarlang bawk.