Meghalaya : CM-in Union Home Minister hmu

Meghalaya chief minister Conrad Sangma chuan Ningani khan union home minister Amit Shah hmuin, state inrelbawlna leh hnam ziarang leh dikna chanvo nghawng thei thil pawimawh eng emaw zat an sawi dun.

Meeting-ah hian CM Sangma chuan Meghalaya-ah All India Services (AIS) cadre hran siam a nih theihna turin Union Home Minister hi a ngen. Tun dinhmunah chuan Assam-Meghalaya hian cadre inṭawm an nei mek a ni. Sangma chuan state tana cadre pek an mamawh thu sawiin, inrelbawlna ṭha leh rintlak tihchangtlun kawngah a pui dawn tih a sawilang bawk.

Chief Minister chuan sorkar laipui chu Khasi leh Garo ṭawngte Eighth Schedule-a telh turin a ngen bawk a, Meghalaya Assembly-in resolution a pass tawh thu leh an thil phut thlawpna atan memoranda eng emaw zat theh luh a nih tawh thu a sawi. Hnam ziarang humhalhna atan ṭawng hrang hrang official-a pawm chu thil pawimawh tak a ni, a ti.

Meeting-a an thil sawi pawimawh lian tham zingah Meghalaya-a Inner Line Permit (ILP) system kalpui a ni. Sangma chuan dan loa pem lut chungchang chu ngaihven tham a ni tih sawiin, ILP system hian state leilung fate leh hnam humhalh kawngah nasa takin a pui dawn tih a sawi.