Tripura : Sorkarin dan leh thupek zawm lo dim dawn lo

Tripura-a BJP thawhpui, TIPRA Motha MLA Philip Kumar Reang chu Agartala-a MLA hostel sak thar chhungah ṭhalai ṭhenkhatin tibuaia an vau hnuah, state sorkar chuan dan leh thupek zawm lote a dim dawn lo tih BJP chuan a sawi.

Buaina hi Thawhṭanni zana thleng niin, Kanchanpur Assembly bialtu MLA Philip Reang chu ṭhalai zurui pathum/pali velin an tibuai a ni.

Rajya Sabha MP leh BJP Tripura unit president Rajib Bhattacharya chuan buaina thlen hnu hian police-te chu a hmunah an thlen thu a sawi. Deputy speaker pawh a hmunah hian buaina chhuah dan zir chiang turin a kal ve nghal a, FIR pawh theh luh a ni tawh bawk. Dan leh thupek chu ngaihpawimawh tur a ni a, dan kalh a chete chu dan anga hrem zel an ni dawn tih an sawi bawk.

He thil thleng chungchangah hian venhimna khauh zawka kalpui a nih thu leh, MLA hostel-ah chauh ni lo, state puma Ganesh Puja lawmna neih mekah pawh dan leh thupek kenkawh ṭhat a nih dawn thu Bhattacharya chuan a sawi. Festival hrang hrang lawmnaah mipui tamtak an pung khawm ṭhin a, hetiang huna dan zawm lote chu sorkarin a hrem zel dawn a ni, a ti.