Meghalaya : Mendipathar College Governing Body chairman ban turin phut

Meghalaya-a North-Eestern Hill University (NEHU) Tura campus-a Confederation of Meghalaya Social Organizations (CMSO), Post Graduate Students’ Union (PGSU) leh social activist Cherian Momin te Meghalaya governor Chandrashekhar H. Vijayashankar hnenah joint petition theh lutin, Mendipathar MLA Marthon J. Sangma chu Mendipathar College-a Governing Body chairman a nihna aṭanga ban turin an phut.

Pathiannia petition an thehluhah MLA Sangma chu a thuneihna hmang dik lo taka hmanga an puh a, hna pek chungchangah duhsak nei leh, hna lakna tura dan siamte bawhchhiain, zirna kawnga an inrelbawlona tichhiaah an puh. MLA hian a fanu, Dingri D. Shira chu Governing Body pawmpuina nei lo leh advertisement tichhuak loin, Directorate of Higher and Technical Education remtihna tel loin part-time lecturer atan a dah tih an sawi.

Petition an theh luhah document an dah telah, hna lakna hi August 22, 2023 khan plain-paper hmanga siam a ni a,, memo number leh official-te hriatpuina pawh a awm lo a ni. Hemi chungchanga RTI hmanga zawhna a chhannaah, Mendipathar College principal chuan Governing Body in hna lakna tur thutlukna engmah an siam loh thu a sawi a ni.

Governor chu dik lo taka hna lak a nih dan hi chhui chiang tura thupek siam tur leh, MLA Sangma chu chhui chian a nih hma chuan Governing Body chairman a nihna aṭanga chawlh tir turin an ngen a ni. Hei hi politics lama inbeihna ni loin, zirna in zahawmna humhimna tur a nih thu an tarlang.