Tripura-a zirtirtu ban ten nawrh chhunzawm zel

Tripura-a zirtirtu ban takte chuan an hna thawh chhunzawm tir phutin khawvawt hnuaiah tiam chin awm loa nawrh an la chhunzawm zel. 

Zirtirtu ban takte hian ni 30 chuang nawrh huaihawt tawh mah se, Tripura-a BJP kaihhruai sorkar chuan inbiakna a la neihpui lo. Sorkar chuan zirtirtu ban takte hi sorkarin deparmtent hrang hrangah hna ruak a siamah dil turin a ti a, mahse hei hi anni lam hian an duh lo a ni. 

Joint Movement Com­mittee (JMC) hminga nawrh huaihawtte hian sorkarin an  hna ngaiah a dah let hma chuan nawrh chhunzawm zel an tum tih an sawi. Eptu pawl, Communist Party of India-Marxist hruaitu leh chief minister hlui Manik Sarkar hoin eptu pawl aiawh mi pangate chuan chief minister Biplab Kumar Deb hmuin, nawrh huai­hawt mekte buaina chinfel dan chu a rang thei ang bera ngaihtuah sak turin an ngen. Hetih lai hian Left Front party leh BJP hi court-in zirtirtute a ban chungchangah hian mawhphurtuah an inpuh tawn a ni. 

Education and law minister Ratan Lal Nath chuan Left Front sorkar khan an sorkar laia hna lak dan chungchanga an tih dik loh avangin sorkar zirtirtu  atana lak 10,323 te chu court thupek anga ban an ngaih phah niin a sawi. Hetih lai hian sorkar chuan court-in banna tur thupek a tihchhuah hnuah, zirtirtu ban takte tan hian post thar 13,000 an siam leh nghal niin a sawi. Kum 2018 inthlan dawn khan BJP hruaitute chuan an sorkarin heng zirtirtute hi dah ngheh vek an tiam a, mahse tun thlengin hma an la zui lo a ni, a ti. 

JMC joint convener Dalia Das chuan an hna aṭanga  ban tak, zirtirtute hian kum tam tak sorkar tan an lo thawk tawh a, sorkarin hna ruak a siam tharte dil tura a tih chu an zinga tam tak chu an kum te a over tawh avangin thil awmze nei lo leh, an dinhmun hriatthiam sak duh lohah a puh. 

"Kum 2020, October 3 khan CM chuan thla hnih chhung ngeiin kan buaina chinfel a tiam avangin nawrh kan titawp a ni. Mahse thla hnih a liam hnuah pawh Deb leh a kaihhruai sorkar chuan engtinmah hma an la zui lo a ni," a ti.