Biak-in sawn chhuak tura thupek sut turin Tribal zirlai pawlin Manipur sorkar ngen

All Tribal Students' Union Manipur (ATSUM) chuan Manipur sorkar hnenah Imphal East district-a Tribal Colony huam chhunga biak-in pariatte insawnchhuak  tura thupek a tihchhuah chu sut turin an ngen. 

ATSUM general sec­­retary SR Andria chuan sorkarin thupek a tihchhuah hun chu a hun lo hlea an ngaih thu a sawi a, Krismas vuakveta kohhrante hnenah hriattirna a pe chu thil lawmawm lo tak a ni, a ti. December 24, 2020 khan Porompat sub-divisional officer, Sanoujam Surchandra Singh chuan biak-in pariatte sakna leh garage an siamna hmun chu sorkar ram chin nia sawiin, insawnchhuak turin thupek a tichhuak a ni. 

Hetih lai hian tribal zirlai pawl chuan kum 2011 khan state sorkar chuan Kristian-te biak-in awmna huam tel loin, sorkar ram china sakhaw hmun pawimawh 188 awmte chu pawmsakna tur thupek a siam niin an sawi. Andria chuan, "He thil hi a ṭha lo hlein kan hria a, state sorkar hnenah kum 2011-a thupek a lo tihchhuah tawhte chu sut a, sakhaw tin huama list thar siam turin kan ngen a ni," a ti.