Assam: CM-in Tirap-a tribal ram dikna chanvo humhalh tiam

Assam chief minister Himanta Biswa Sarma leh Coordination Committee of Tribal Organizations of Assam (CCTOA) chuan Nilaini khan Janata Bhawan, Dispur-ah meeting an nei a, Tirap Tribal Belt-a protected class dinhmun tihzauh chungchang an sawi ho. Meeting-ah hian tribal affairs Minister Ranoj Pegu pawh a tel.

CCTOA chief coordinator, Aditya Khakhlari chuan Chief Minister-in Tirap-a leilung fate dik takte chu an ram chungchanga dikna chanvo neih chu humhalh sak reng a tiam tih a sawi. Hemi rual hian CM chuan tribal ni lote chu tribal ram an lei leh hralh phal a nih loh tur thu a sawi bawk. Hei mai bakah traditional tribal khuate chu heritage village-ah siam a ni dawn a, dan thar hnuaiah khawtlang hruaitute pawh tribal mi an nih chhunzawm zel tur thu te, Tirap-a tribal pawlte tan reserved village panchayat siam a nih tur thu Sarma chuan a puang bawk.

State puma Tribal Belt leh block aṭanga dan loa pem lut leh inbengbelte thawn chhuah tumin sorkarin hma a la mek tih Khakhlari chuan a sawi.