West Sikkim-ah leimin vangin mi 4 an thi

West Sikkim-a Yangthang Constituency-a Upper Rimbi-ah Ningani zan zanlai khan leimin nasa tak thlengin mi pali an thi a, pakhatin hliam na tak a tuar. Chin hriat lohin mi pathum an awm bawk.

Superintendent of police (SP) Geyzing, Tshering Sherpa chuan leimin hian in eng emaw zat a hnawl tih, a hmun a awih avang leh, ruah a sur chhunzawm reng avangin chhanchhuah hna thawh pawh a hautak hle tih a sawi. Police-te chuan tualchhung mite leh Sashastra Seema Bal (SSB) sipaite puihnain hmeichhe pahnih hliam na tak tuar an chhanchhuak tih a tarlang.

Chhanchhuah hna thawktute hian Hume lui lian karah thing hmanga siam lei (tree-log bridge) an siam chawp hmangin hliam tuarte hi District Hospital an panpui a ni.

Nimin khan bialtu MLA leh minister Bhim Hang Limboo chuan chhiatna thlenna hmun hi tlawhin, chhan chhuah hna thawh dante a enpui a ni. Harsatna tawkte ṭanpui leh chhan chhuah hna thawhna kawnga thawktu hrang hrangte inpekna chu fakawm a tih thu a sawi.

Tun kar tir lam Thawhṭanni zanlai khan Sikkim-a Gyalshing district-a leiminin hmeichhe pakhat in a lo hnawl tawh bawk a, a thi niin police-te chuan an sawi. Nunna chan hi kum 45 mi Bishnu Maya Portel, Thangshing khuaa cheng a ni. India Meteorological Department (IMD) chuan Sikkim-ah hian ruah nasa tak a la sur chhunzawm dawn niin an tarlang.