SC-in foreigners tribunal kalpui tan turin hriattir
Supreme Court chuan Assam-a foreigners tribunal hawn thar 64 te chu August 10 aṭanga kalpui ṭan turin sorkar laipui leh Assam sorkar a hriattir.
Justice Ranjan Gogoi leh Justice Rohington F Nariman te awmna division bench chuan Assam-Bangladesh ramri venhimna chungchanga Commissioner Upamanyu Hazarika report thehluh chu pawmin, sorkar laipui leh Assam sorkar chu ramri venhimna tihchangtlunna tur te, ramria kawngpui leh a hungnaa eng chhit tur chungchangah a rang lama hma la nghal turin a hriattir bawk.
Hazarika report chuan Dhubri sector-ah lui a awm avangin ramri chu hung theih a nih loh thu leh he lai hmunah ramri vengtute'n patrolling an neih ngai loh thu a tarlang. Silchar sector-ah pawh ramri hungna hmun
ṭhenkhatah floodlight chhit a nih loh avangin venhimna a ṭhat tawk loh thu leh ramri hungnaah chuan electric power kaltir a nih loh thu a tarlang bawk.
State police te'n Dhubri leh Silchar sector-ah patrolling an neih ṭhat loh avangin ramri kana Bangaladesh mi India rama rawn lut an awm ṭhin thu report chuan a tarlang bawk a, metre 150-a thui ramri hung lohna hmun aṭangin khaw mipuite chuan zalen takin ramri an kân thu a tarlang bawk.
Supreme Court Bench chuan Assam-a India leh Bangladesh ramri venhimna zirchiang turin Upamanyu Hazarika chu Court Commissioner-ah ruatin, ramri chu a hmuna enfiah tur leh report thehlut turin a hmain a lo hriattir tawh a ni.
SC hian Gauhati High Court chu foreigners tribunal thar 64 hawnbelh turin a lo hriattir tawh bawk a, tribunal-a thawk turte pawh a rang lama bawhzui turin a hriattir a ni. Assam-ah hian dan loa pemlutte thubuai ngaihtuah turin foreigners tribunal 36 a awm mek a, tribunal thar 64 te hian August 10 aṭanga hna an ṭan thei a nih chuan tribunal 100 a awm dawn a ni.
SC bench hian Citizenship Act Rule 3, India rama nau piang mahse a hringtu nu leh pate dan loa India rama lutte chungchang ngaihtuahin, sorkar lailpui leh state sorkar chu July 21 hmaa an chhanna thehlut turin a hriattir bawk.