JCILPS-in bandh huaihawt leh

Manipur leilung fate hum­halhna atana bill thar pass phutin, Joint Committee on Inner Line Permit System (JCILPS) chuan Thawhlehni khan darkar 14 awh bandh a huaihawt leh.

JCILPS thil phut nawrnaa tha­rum thawhna leh thil duh­awm­lo thleng ṭhin laka inven nan state sorkar chuan July 8 aṭangin Imphal-ah tiam chin nei lo curfew a lo puang tawh a, Thawhlehni pawh khan curfew hi darkar 11 chhung thlahdul a ni.

Hetihlai hian state sorkar chuan Manipur Regulation of Visitors, Tenants and Migrants Workers Bill, 2015 chu hnuhkir a rel tawh a, hemi atan hian nimin khan emer­gency session a nei nghal.

JCILPS student wing chuan leilung fate hum­halhna inner line permit (ILP) system emaw a tluk­pui dan state sorkarin siam a nih hma chuan nawrh chhunzawm zel an tum thu a tarlang.

Imphal East leh West district thuneitute chuan nimin zing dar nga aṭangin darkar 12 chhung curfew an thlahdul leh bawk.