Arunachal CM-in budget pharh dawn
Arunachal Pradesh Chief Minister Nabam Tuki chuan vawiin hian kum 2015-16 state budget a pharh dawn.
Finance portfolio changtu Tuki chuan budget-in ṭhalai hna neilote tana hna siam lam leh thiamthil tihhmasawnna lam a ngaihpawimawh tur thu a sawi. "State sorkar chuan kuminah hna thar siam a ngai pawimawh dawn a, kumin chu 'year of employment and skill development' a ni dawn a ni," a ti.
Economic service, industry leh tourism department te chuan ṭhalai hna nei lote tan self employment scheme an siam ang a, hei bakah hian engineer hna nei lote bul ṭan nan subsidise scheme siam a ni bawk ang, tiin CM chuan a sawi
NITI Aayog-in a pawmpui hnuah financial year kal mek atan Tuki chuan budget-ah cheng vaibelchhe 10,200 a pharh dawn a ni.
Arunachal Chief Minister chuan infarstructure hmasawnna chu budget-in a ngaihpawimawh tel tur thu leh social sector-ah education leh health te pawh ngaihpawimawh a nih tur thu a sawi bawk.
NITI Aayog chuan thla hmasa khan Arunachal Pradesh chu India rama state hnathawk ṭha ber zingah a puang a ni. NITI Aayog CEO Shindhushree Khullar chuan state sorkarin sum leh pai harsatna a tawh mek laia a sum vawn dan leh enkawl dan chu fakawm a tih thu a sawi.
Tuki hian June 12 khan ITI Aayog vice-chairman Arvind Panagariya leh CEO Khullar te hi New Delhi-ah a lo hmu tawh a, state budget ruahman dan tur leh sorkar laipui budget aṭanga state chanvo chungchangte a sawipui a ni.