Manipur emergency session vawiinah nei dawn

Manipur-a rorellai Cong­ress Legislators Party (CLP) chuan Pathiannia Manipur Regulation of Visitors Tenants and Migrant Workers Bill, 2015 hnuhkir a rel hnuah a hnuhkir nan state cabinet chuan vawiin hian Legislative Assembly emergency session neih a rel.

Pemlutte lak aṭanga Mani­pur leilung fate humhalhna atana Joint Committee on Inner Line Permit System (JCILPS)-in nasa taka inner line permit (ILP) system emaw a tlukpui dan siam a phut hnuah state sorkar chuan kumin March 16 khan special session koin, Manipur Regulation of Visitors Tenants and Migrant Workers Bill, 2015 hi a pass a ni. Mahse JCILPS chuan bill chu a hriam tawk lo tia hnuhkir a phut hnuah state sorkar chuan Pa­thianni khan hnuhkir a rel a, Thawhṭannni khan cabinet meeting neih niin, bill hnuhkir nan emergency session neih an rel leh a ni.

Manipur Legislative Assem­bly speaker chuan nimin khan emergency session neih tur chungchangah Business Ad­visory Committee a ko nghal.

State cabinet meeting chuan Migrant Workers Bill, 2015 hi hlih a nih theih nan vawiin hian emergency session a ko a ni, tiin official chuan a sawi.

JCILPS-in Migrant Wor­kers Bill, 2015 hnukkir a, bill thar buatsaih a phutnaah kar kalta July 8 khan kawngzawhte leh police te innawrnaah pawl 11 zirlai, Sapam Robinhood Singh a thi a, a ruang hi JNIMS damdawi-in morgue-a dah niin, JCILPS chuan state sorkarin bill thar a pass hma chuan a ruang hlawm a tum loh thu a tarlang.

Vawiina session-ah hian Chief Minister chuan Manipur Regulation of Visitors Tenants and Migrant Workers Bill, 2015 hnuhkirna tur motion a pulut ang a, mahse JCILPS thil phut, leilung fate humhalhna tur bill thar erawh putluh a ni dawn em tih erawh a la chiang lo.

JCILPS te nawrh huaihawt avangin state sorkar chuan tiam chin awm loin Imphal-ah curfew a puang a, mahse JCILPS-in nawrh huaihawt chhunzawm a tum rih loh avangin curfew hi hunbi neia nitin thlahdul a ni.

JCILPS pawhin Thawhṭanni aṭanga hman turin non-Manipur te lakah ni nga awh curfew a puang bawk.

JCILPS convenor convener Rabindro Salam chuan Thawhṭanni khan Sapam Robinhood Singh te chenna veng tant­langtu, Dinku road chu tiam chin awm loa khar a nih tur thu sawiin, sorkarin leilung fate humhalhna bill thar a pass hma chuan a ruang chu hlawm an tum loh thu a sawi.