M’laya-in Plant Board hotu hlui thubuai siamsak

Meghalaya sorkar chuan Meghalaya State Medicinal Plant Board (MSMPB) hotu hlui, T.T.C. Marak lakah sum tih­chingpen thubuai a thehlut.

State sorkar hian kum 2009- 2011 chhunga Ma­rak-a'n MSMPB sum vai­belchhe 3.28 chuang a tihchingpen chungchangah East Khasi Hills SP office-ah FIR a thehlut.

Special audit report a neih hnuah June 30 khan state sorkar chuan FIR hi a thehlut a, Board-in phalna nei loa bank account a hawn dante leh sum a hmanchhuah danah thil fel lo hmuhchhuah a ni.

Plant Board hnuaia Guwahati M/s Vista Agri­tech Private Ltd. (VAPL)-in scheme a kalpui danah thil fel lo hmuh a ni bawk a, VAPL hian kum 2010-11-a bill cheng nuai 47.98 a lak dan chipchiar a la tarlang lo.

Audit report chuan Marak hian MSMPB Rule (15) (k) bawhchhiain, October 30, 2009 khan VAPL hnena pek tur, Rs nuai 28.50, Rs nuai 35 leh Rs nuai 29 self cheque a siamchawp thu a tarlang bawk. Plant Board hnuaia project kalpui turin Marak hian VAPL hi tender mumal taka chhuah lo leh Board pawmpuina loin a thlang tiin audit report chuan a tarlang bawk.

VAPL hnenah hian a vaiin cheng vaibelchhe 2.85 pek a ni a, pawisa hmanna chipchiar, bill erawh thehluh a la ni lo.

VAPL-in Plant board project a kalpui danah thlai chi leh bungrua leinaahte, fertilizer leina leh pump house siamnaahte a pawi­saa pe loa cheque-a pekchhuah tur a nih laiin pawisa faia thil leina man pek a ni bawk.