Sipaite pawikhawihna report turin SC-in ngen

Supreme Court chuan Manipur-a sorkar si­pai­te pawikhawihna report thehlut turin sorkar lai­pui, state sorkar leh Na­tio­nal Human Rights Com­mission (NHRC) a hriattir.

Hel leh sorkar sipaite inkahna lem tia sawi, fake encounter-ah Manipur-a pawisawilo eng emaw zat an thi tawh a, hei vang hian Supreme Court chuan report chipchiar buatsaiha thehlut turin a hriattir a ni. Heng zingah hian FIR thehluh lohna fake en­counter thubuai 62 pawh a tel.

Sipaite kuta pawi­sawilote thihna chung­changah SC chuan state sorkar chu zâng­nadawmna leh chhawmdawlna pek kawngah hma la ṭhaloah a puh bawk, inkahna chu a tak emaw a lem emaw inkahna a ni tih chu thudik a ni, a ti.

Justice Madan B Lo­­kur leh U U Lalit te awm­na SC social justice bench chuan sorkar laipui, state sorkar leh NHRC chu sawiselin, kum 2015 thlenga fake encounter thubuai an hnena thlen turin an hriattir a ni.

"Mihring thih dan pangngai a nih loh chuan eng vangin nge in ngawih reng? Hetiang thil thleng hi mak inti ve lo em ni?" tiin social justice bench thuchhuak chuan a tarlang.

Extra Judicial Exe­­­cution Victims’ Families Association chuan fake encounter-a pawisawilo thihna thleng chungchangah PIL an thehlut a, tun hnaia hearing neih ṭumin SC bench chuan hriattirna a pe a ni. August 3-ah hea­ring neih leh a ni ang.