Kum 2028-29 ah Tripura-in alu intodelh a tum : Agriculture Minister

Tripura agriculture minister, Ratan Lal Nath chuan kum 2028-29 ah an state chu alu ah intodelh tumin target an siam tih a sawi.

Inrinni liam taa Civil Secretariat, Agartala-a chanchinbu mite a kawmnaah, Nath chuan 2029-30-ah chuan alu chu an state mamawh zat an intodelh bakah, state dangah thawn chhuah theih an tum tih a sawi bawk. Potato chips siamna tur, processing centre chu Rs vbc 35.53 sengin siam a ni dawn a ni, a ti.

Minister chuan alu chu an state-a thlai chin nasat zingah a tel tih sawiin, loneitu 23,746 velin an ching mek tih a sawi. A chi hi tualchhung bazar, West Bengal leh Punjab-a mite an lei a, mahse hengte a thar chhuah lamah duhthu a sam tawk lo tih a sawi. Hei vang hian state sorkar chuan chin tur True Potato Seed (TPS) pawh a lo kalpui tawh a, hei pawh hi an duhthusam ang a la pha chuang lo a ni. Mahse, Apical Rooted Cutting Technology an hman hnuah a thar chhuah lamah a hlawk phah hle tih a tarlang.

Kum 2022-23 khan loneitu 104 te hnenah chin turin alu chi hi sem an ni a, 2023-24-ah loneitu 420 leh financial year kal mekah mi 4,000 hnenah alu chi pek an nih thu Minister chuan a sawi.