Manipur-in Migrant Worker Bill a hnukkir

Joint Committee on the Inner Line Permit System (JCILPS) activist te'n nasa taka an nawr hnu­ah Manipur-a rorellai Cong­­ress Legislature Party (CLP) chuan Pathianni khan Manipur Regulation of Visitors, Tenants and Migrant Workers (MRVTMW) Bill 2015 chu hnuhkir a remti.

Chief Minister secretary chuan hemi chungchangah hian thuchhuah a siam nghal. Kar kalta Inrinni khan Chief Minister Ibobi Singh chuan Guwahati-a hmarchhak state Chief Minister te leh Union Home Minister Rajnath Singh-a'n meeting an neih ṭumin Manipur-a inner line permit (ILP) system kalpui a duh thu a lo sawi tawh bawk.

CLP meeting zawhah Chief Minister chuan MRVTMW Bill 2015 chu hnuhkir a nih rualin CLP chuan Assembly special session neih a remtih thu a sawi a, Bill hnuhkir nan hian nimin khan cabinet meeting neih nghal a ni.

JCILPS-in leilung fate humhalhna atana ILP system emaw a tlukpuia dan siam a phut hnuah state sorkar chuan March 16 khan special session koin MRVTMW Bill 2015 hi a pass a ni a, mahse JCILPS chuan bill chu leilung fate humhalhna atan a hriam tawk lo tiin, hnuhkir a phut leh a ni.

Bill hi March 19 khan Gover­nor hnenah thawn a ni a, June 23 khan Governor chuan bill chu India President sawipui turin a dah thu a sawi.

Chief Minister chuan bill chu All Political Parties Forum on ILPS leh dan hremi te rawna buat­saih a nih thu sawiin, JCILPS chuan pawm vek lo mah­se Governor-in a pawmpui hnuah an duh anga amend (siam ṭhat) theih a ni, a ti.

"Tun hnaia budget session neih zawh takah pawh bill hnuhkir dan tur leh bill thar buatsaihnaah mithiamte kan rawn leh tur thu ka sawi tawh a ni," tiin Ibobi chuan a sawi.