Police thuamchakna fund sorkar laipuiin chhunzawm dawn

Sorkar laipui chuan police thuamchakna atana hmarchhak state te hnenah fund a pek chhun­zawm dawn.

Ministry of Home Affairs (MHA) official chuan he thu hi sawiin, hmarchhak bialah sorkar laka helna chu a tlahniam zel a ni, a ti a, police force te chu mipui hmasawnna tur thlir chung zela an kal a ngai a ni, a ti.

MHA official chuan sorkar laipuiin central tax aṭanga state tinte chanvo a tihpun hnu­ah police modernization scheme kalpuina atana fund a pekte chu tihtawp a tum thu a sawi a, mahse hmarchhak Chief Minister te'n Union Home Minister Rajnath Singh hnenah fund chu chhunzawm tura an ngen avangin ngaihtuah ṭhat a ni ang, a ti.

"Sorkar laipui chuan hmar­chhak state Chief Minister te ngenna chu ngun takin a ngaih­tuah mek a, hun eng emaw chen chu police modernization fund hi a pe leh maithei," tiin a sawi.

Police modernization scheme hnuaiah sorkar laipui chuan hmarchhak state chu police te bungrua tihchangtlun nan fund a pe ṭhin a, he fund hmang hian police infrastructure hrang hrang, police station leh quarters te pawh sak ṭhin a ni. Hei bakah hian com­puterization atan pawh fund pek an ni bawk.

Official chuan police te hnathawh kalphung thlak a hun tawh thu sawiin, hun kaltaa hmarchhak state police te buaipui ber chu sorkar helte an ni a, mahse tunah chuan helte pawikhawihna a tlakhniam tawh avangin sorkar laipui chuan police te chu mipuite hamṭhatna lam ngaihtuah tura a duh tawh thu a sawi.

Union Home Minister Singh-a'n hmarchhak biala Central Armed Force te tihtlem a duh thu a lo sawi tawh a, hemi avanga central force te lakchhuah ṭhen a ni ang em tia zawhna chu MHA official chuan chhangin, "Helte an hluar vanglaiin central force te dahbelh an ni a, mahse tunah chuan tharum thawhna a tlahniam tawh a, central force te hi lakchhuah an la ni lo. Hetihlai hian hel hluarna state te chuan sorkar laipuiah India Reserve Battalions siambelh nan fund dilin, an siam belh zawk a, hei vang hian central force te dah dan leh hmanna tur pawh ennawn a ngai tawh a ni. Sipai dah ṭeuh ringawt chuan mipuite rilruah thil ṭha lo a thlen avangin ennawn a ṭul tak zet. Central force te chu sorkar laipuiin a duhna hmunah a dah thei reng a ni," tiin a sawi.