Amnesty-in AFSPA ennawn phut ENSF-in AFSPA hnukkir turin ngen

Sorkar laipui chuan hmarchhak biala Central Armed Force a dahte lak­chhuah ṭhen a tum thu a sawi hnuah Amnesty International India chuan hmarchhak state ṭhen­khata Armed Forces (Spe­cial Powers) Act lekkawh mek chu ennawn a duh thu a tarlang.

Union Home Minister Rajnath Singh chuan hmarchhak state Chief Minister te meeting a neihpui ṭumin hmarchhak biala tharum thawhna a tlakhniam zel avangin central force tam lutuk chu tihtlem ṭha a tih thu a sawi.

Amnesty Inter­national India Media Officer Himanshi Matta chuan armed force tihtlem tumna vang hian AFSPA kalpui dan pawh ennawn a nih phah a beisei thu a sawi a, mahse hmarchhak venhimna chungchanga Union Home Minister leh Chief Minister te meeting-ah AFSPA chungchang sawilan a ni lo chu mak a tih thu a sawi bawk.

Amnesty thuchhuak chuan pawngsual thubuai leh dan awmsate ennawn tura din, Justice Verma Committee chuan AFS­PA chu pawngsualna leh hmeichhiate chunga hleilenna hluar chhan a ni, tia a tarlan thu a sawi a, Manipur-a armed force te kuta pawisawilo thihna chungchang zirchiang tura Supreme Court-in a din, Justice Santosh Hegde Commission chuan AFSPA chu in­hnuai­chhihna hmanrua tia a lo tarlan tawh thu a tarlang bawk.

Hetihlai hian sorkar laipuiin AFSPA Section 3 tlawhchhana Nagaland state pum 'disturbed area'-a a puan chu Eastern Naga Students Federation (ENSF) chuan hnukkir turin a ngen.

ENSF vice president Z. Throngshe Yim leh general secretary Honang Jessuhu chuan thuchhuah an siamah 'disturbed area'-a Nagaland puanna thuchhuah Ministry of Home Affairs (MHA)-in July 8-a tihchhuah chu an dem thu tarlangin, AFSPA chu mipuite in­hnuai­chhiahna leh tih­duhdahna hmanrua a ni, a ti.

AFSPA chu dan bawh­chhetu security force te humna dan a ni a, hei vang hian security force te chu pawisawilote chungah rawng takin an chet phah ṭhin a ni, a ti. ENSF chuan sorkar laipuiin disturbed area-a Nagaland a puan chhan a hriatthiam loh thu a tarlang bawk.