Doctor te'n hawrawppui hman an thlawp

Doctor-in damlote hnena damdawi an chawhna lehkhaa hawrawppuia ziak tura Union Health Minster JP Nadda-a'n tun hnaia a rawt chu North Eastern Indira Gandhi Regional Institute of Health and Medical Science (NEIGRIHMS) director Dr AH Ahangar-a'n a pawm thu a sawi.

Union Health Minister thil rawt hi thil thar a ni lo a, doctor te kutziak chhe lutuk chu khawvel hmun dangah pawh an lo buaipui tawh ṭhin a ni. Doctor kutziak chhia avanga damdawi eisuala thih phahte pawh an awm a, US-ah chuan kum khatah damlo 5,000 chu damlote natna vang ni lo, “non-medical reasons” vangin an thi a, India ramah hetianga thi zat hi hriat theih loh mah se, tam tak an awm rin a ni.

Meghalaya Medical Service Asso­ciation president Dr Aman War pawhin Union Minister rawtna chu a pawm thu sawiin, damlote ṭhatna tur a nih chuan eng rawtna pawh a pawm tur thu a sawi.

NEIGRIHMS Radiology depart­ment-a professor Dr C Daniala pawh­in damdawi chawhna lehkhaa haw­rawp­­puia ziah chu ṭha a tih thu sawiin, computer-a type theih nise a duh zawk thu a sawi. "A chang chuan kan thawhpuite kutziak chhiar theih loh chang kan nei ṭhin a, keimahni kutziak ngei pawh kan chhiar thei tawh lo ṭhin," tiin a sawi.

Hawrawppuia doctor damdawi chawh­na lehkhaa ziah tur chungchangah Union Health Ministry chuan hriattirna tihchhuah thuai a tum a, tihchhuah a nih chuan doctor te'n damdawi chawhna lehkha an ziahah hawrrawpui vekin damdawi hming leh natna hmingte an ziah a ngai tawh dawn a ni.