M'laya-ah zu leh ruihhlo a hluar

New Hope Centre Khasi Jaintia Presbyterian chuan Meghalaya, Jaintia Hills leh West Khasi Hills district-ah zu leh ruihhlo damdawi hman a hluar thu a tarlang.

New Hope Centre project director Chantel M Nikhla chuan damdawi ruihhlo leh zu in nasat lutuk ṭhat lohna mipuite zirtir chu centre thil tum a ni, a ti a, an thil tum chu sakhaw inzirtirna leh service hrang hrang hmanga puitlin an tum thu a sawi.

Nikhla-i chuan zu leh ruihhloa harsatna neite chu zirtirtu emaw khawtlang hruaitute hmanga chinfel tum chi a nih loh thu sawi­in, mithiamte ruaia coun­selling leh service hrang hrang pek ngaite pek ṭha a tih zawk thu a sawi.

"Chhungkaw ṭhen­khat chuan khawtlangin an hriat an hlauh vangion anmahni zinga mi ruihhlo nghawlvei an awm tih an pawm duh ṭhin lo a, hetianga chhungkaw thilthleng phat tum hi a hlauhawm zia kan peer educator te kaltlangin kan hriattir ṭhin. An chhungkaw mem­ber te'n an turluih avanga kan ṭanpuina dilte centre-ah kan dah ngai lo a, anmahni tum avang leh duh avanga kan hnena lo kalte erawh kan hnar ngai lo," tiin a sawi bawk.

Ruihhlo ngawlveite chuan anmahnia tumna an neih loh chuan ṭanpui a harsat thu sawiin, kum­inah mi 50 chu an ṭanpuina dila an kal tawh thu a sawi a, heng mite hi kum 20 aṭanga 35 inkar an nih hlawm thu a sawi bawk.