Manipur : Tuilian leh leimin vangin zirna in khar

Manipur-ah ni eng emaw zat kalta chhunga ruahsur tam avangin district ṭhenkhatah tui a lian a, highway-ah leimin a tam avangin mimal lirthei leh sumdawngte tan harsatna a thlen nasat avangin sikul leh college zawng zawng chu nimin khan khar a ni.

State sorkar chuan September 15 khan thuchhuah pahnih siamin, Directorate of Education-in sikul zawng zawng khar vek tura a tih bakah, Directorate of University and Higher Education chuan valley district-a college hrang hrangte chu khar turin a ti bawk.

Education director Ng. Bhogendra Meitei chuan state puma sikul zawng zawng - sorkar, central, mimal, sorkar enkawl leh enkawl loh te chu tuilian leh leimin a thlen nasat avangin zirna inte chu khar chhunzawm zel a nih tur thu a puang a ni. University and Higher Education director L. Radhakanta chuan district panga - Imphal West, Imphal East, Bishnupur, Kakching leh Thoubal-a college-te chu khar turin thupek a chhuah bawk a ni.

Thuneitute chuan thil awmdan uluk takin an thlithlai reng a, boruakin ṭhat lam a pan hunah zirna chhunzawm leh hun tur an puang dawn tih an tarlang.