Assam-in hna zawnglaite coaching pe dawn

9th July, 2015

Civil services, defence services, IIT, IIIT entrance exam leh hna dang exam tumte tan Assam sorkar chuan coaching a buatsaihsak dawn.

CM Tarun Gogoi chuan tun hnaia UPSC exam result chhuaka Assam mi 15 tlingte chu a lawmpui thu sawiin, UPSC exam pek tumte tan a thlawna coaching pekna scheme kalpui an tum thu a sawi.

"UPSC exam-a Assam mi 15 hlawhtlinna hian kan ṭhalaite hi zirnaah an hlawhtling thei a ni, tih a lantir a, an hlawhtlinna hi hun lo la kal zel turah midangte cho phurna a ni zel ang," tiin Gogoi chuan a sawi.

Gogoi chuan Assam-a coaching centre ṭha awm lo chu zirlaite tana harsatna a nih thu sawiin, competitive exam-a ṭhalai tam zawk an hlawhtlin theih nan coaching centre hawnna tur chu bawhzui an tum thu a sawi bawk.