Funding pattern 90:10 hman a la ni ang: Jaitley
Union Finance Minister Arun Jaitley chuan sorkar laipuiin state te hnena fund a pek dan kalphung 90:10 chu hmarchhak state te tan hman a la nih tur thu a sawi.
Jaitley chuan he thu hi amah hmutu Meghalaya sorkar aiawhte hmaah Thawhṭanni khan a sawi a, 14th Finance Commission rawtna anga state hnufualte tana special central assistance programme tihtawp tumte pawh ennawn a nih tur thu a sawi.
14th FC rawtna angin BJP kaihhruai NDA sorkar chuan funding pattern 90:10 a hman ṭhin chu 50: 50 a thlak a tum a, hei hi hmarchhak state Chief Minister te'n an dodal nasa hle. 90:10-ah hian sorkar laipui chuan 90% chu grant-in a pek a, 10% erawh loan angin a pe ṭhin.
Finance Commission hian state tinte chu fund pekchhuah kawngah special bik an awm lo tiin, tax devolution angin 42% pek a rawt a, mahse hemi aṭang hian Meghalaya chuan state mipui tam zawng, ramngaw zau zawng leh thil dang aṭanga chhutin 0.642% chauh a takin a dawng thei dawn a ni.
Meghalaya sorkar aiawhte chuan central tax aṭanga state te chanvo pekchhuah kawngah hmarchhak state leh Meghalaya chu state dangte nena intluktlanga en an nih chuan ‘special category states’ an awm loh tur thu leh state liante chauhin an hlawkpui theih tur thu Jaitley an hrilh bawk.
Union Finance Minister Jaitley chuan hmarchhak state te hnena special central assistance pek chungchang hi Prime Minister Narendra Modi a sawipui tawh bawk.
Hmarchhak state te hian sorkar laipui aṭangin special assistance an hmuh loh chuan central project kalpui mekte chu chhunzawm theih an nih loh tur thu Meghalaya sorkar aiawhte chuan Jaitley an hriattir bawk a, special category status tihtawp a nih chuan hmarchhak biala hmasawnna scheme hrang hrang kalpui mekte pawh chawlhsan vek a ngai dawn a ni, an ti.