Guwahati Police te'n Akhil-a thubuai siamsak

Guwahati Police te chuan Assam-a loneitu pawl, Krishak Mukti Sangram Samiti (KMSS) president Akhil Gogoi chu Thawhlehni khan thubuai an siamsak.

Meghalaya hmeichhe pakhat ruang Dispur po­lice station-a hmuh a nih chungchanga a thusawi avangin police te chuan Akhil-a hi thubuai an siamsak a ni.

Guwahati Police thu­puangtu chuan Akhil-a hian hmeichhe pakhat thihna chungchangah thil inthup a awm a ni, tiin a sawi a ti a, hei hian hnam pahnih inkarah inhmuhthiam lohna a thlen a ni, a ti.

Dispur police station bathroom-ah kum 39-a upa Shillong hmeichhe ruang hi a nghawngah inkhaiin hmuh a ni. KMSS hotu Akhil chuan hmeichhia hi police te'n an pawngsual hnuah an that a ni, tiin a sawi a, mahni intihlum anga miin an ngaih theih nan amah khawihtu police te hian a nghawngah an khai a ni, a ti.

Hmeichhe thihna thu­buaiah Dispur police sta­tion-a FIR thehluh a nih angin police te'n an chhui mek a ni, tiin Guwahati police thupuangtu chuan a sawi.

Guwahati Police Com­missioner Mukesh Agrawal chuan Joint Com­missioner NMASF Haque kaihhruaina hnuai­ah hmeichhe thihna thu­buai hi a chhuitir a, Assam Human Rights Com­mis­sion pawhin thil thlen dan report thehlut turin Kam­rup Metropolitan De­pu­ty Commissioner M An­gamuthu a hriattir bawk.

Dispur police sta­tion chhunga thihna thleng chung­changah hian Me­gha­laya State Women’s Com­­mission pawhin Me­­ghalaya police te chu report thehlut turin a hriattir bawk.