MNP hman phalna BSNL-in dil tum

Bharat Sanchar Nigam Limited (BSNL) chuan Telecom Ministry hnenah hmarchhak biala Mobile Number Portability (MNP) hman phalna dil a tum

BSNL NE1 Chief General Ma­nager DP Singh chuan he thu hi sawiin, Union Minister-in Agartala a tlawh hunah hmarchhak biala MNP service hman phalsak tura ngen a tum thu a sawi.

MNP service hi mobile number ngai reng hman theihna a ni a, service operator danga thlak duh pawhin number ngai hman theih a ni.

India ram pumah July 3 a­ṭang khan hman ṭan a ni a, mahse hmarchhak bialah chuan ram ven­himna thil avangin MNP service hi hman phal a ni lo.

BSNL hotu Singh chuan Univer­sal Service Obligation (USO) scheme aṭanga thingtlang hmun kilkhawra tower 100 an bunte chu a enkawlna senso sang lutuk vangin an tihtawp thu a sawi a, he­tihlai hian sorkar laipui chuan hmar­chhak state khaw 8,617-a mobile service tih­changtlun nan cheng vaibelchhe 5,336 hu project a pawmpui thu a sawi.

"Project hnuaiah hian 2G mobile service awm lohna hmunah service pek a ni ang a, nakkum September aṭangin transmission network changtlung tak kan neih hman ka beisei," tiin Singh chuan a sawi.

BSNL NE1 circle chuan kum­inah vaibelchhe 88 a hloh thu Singh chuan a sawi bawk a, hemi rual hian revenue chu vaibelchhe 17-a a pun thu leh network tih­chang­tlun nan vaibelchhe 46 hu bungrua dahbelh a ni, a ti.

Wi-fi hotspot connectivity pek nan Meghalaya-a hmun 44, Mizoram 35 leh Tripura-a hmun 94 thlan a nih thu Singh chuan a sawi bawk.