Assam-in central fund hmuh dan chipchiar tarlan tum

Assam sorkar chuan central-a UPA sorkar lai leh tuna NDA sorkar aṭang­a central fund a hmuh dan chipchiar tarlan a tum.

Chief Minister Tarun Gogoi chuan he thu hi sawiin, "UPA leh NDA sorkara central fund kan hmuh dan chipchiar taka tarlan kan tum a, a ṭul chuan Assembly-ah sawiho tura tlangzarh a ni ang. Mipuite hian thudik leh fund kan hmuh dan chipchiar an hriat a ṭul a ni. Sorkar laipui chuan min chhanlet a tum a nih chuan Assam hnena fund a pek dan tarlang ve rawh se," tiin a sawi.

North Eastern Coun­cil (NEC) hnuaiah Go­goi chuan nikum khan vaibelchhe 312.39 rua­hmansak ni mah se sorkar laipui chuan vaibelchhe 71.84 chauh a pechhuak tih a sawi a, kuminah pawh a sum ruahmansak aṭangin vaibelchhe 10 chauh a takin an la dawn thu a sawi.

Nikum leh kuminah Non Lapsable Central Resource Pool (NLCRP) hnuaiah Assam tan cheng vaibelchhe 289.63 ruahman a ni a, mahse nikum khan state sorkar chuan vaibelchhe 151 chauh a dawng a, kumin hian NLCRP aṭangin cheng khat mah a la dawng lo.

"Central fund hmuh ṭhat loh hi Assam buaina chauh a ni lo a, hmarchhak state dang zawng zawng pawhin he harsatna hi an hmachhawn mek a ni. Rorelna dik ka sual lo anga maw? Sorkar laipui hian fund min pek a ngai a, fund min ruahmansak turin nawr luih an ngai a ni," tiin Assam Chief Minister chuan a sawi bawk.

Sorkar laipuiin state te tana fund a ruahmansak lo chu state budget buat­saih leh tihpuitlin har­sat chhan a ni, a ti a, hemi rual hian state sen­so tihtlem nan hna lak tihtlem emaw mipui ham­ṭhatna scheme-ah senso tihtlem a ngaih thu a sawi.

Chief Minister Gogoi chuan nikum khan Assam tuilian enfiah turin central team te'n Assam an tlawh thu leh chhawmdawlna atan vaibelchhe 414 an ruahmansak thu a sawi bawk a, sorkar laipui chuan vaibelchhe 387 a pawmsak a, mahse cheng khat mah a la pekchhuah loh thu a sawi.