Arunachal-in khauh zawkin ramri venghim dawn
Arunachal Pradesh sorkar chuan khauh zawka ramri venhimna kalpui a tum thu tarlangin, an ṭhenawm state ramria paramilitary force te'n patrolling an neih ṭhin pawh zing deuh zawka neih a nih tur thu a tarlang.
June 5 khan Assam ramri khua Behali-ah silai kengte'n tharum thawhna thlenin, lirthei pakhat an hal bakah mi pahnihin hliam an tawrh phah a, hei vang hian state sorkar chuan khauh zawka venhimna kalpui a rel a ni.
Home Minister Tanga Byaling chuan assembly session-ah eptu hruaitu, Tamiyo Taga zawhna chhangin Assam ramri district tinah patrolling chu ngawrh zawka neih a nih thu leh tharum thawhna a thlen nawn tawh loh nan district thuneitute chu theihtawp chhuaha hma la turin a hriattir tih a sawi.
Byaling chuan Arunachal-Assam ramria June 3-a thil thleng tarlangin Assam Sonitpur district-a, Serelia khaw mi, Nehru Orang chu a unaupa Kolai Orang leh mi pakhat, Lobin Orang nen Hatimara ramhnuaia tuahthing la tura an chhuah thu a sawi a, ram hnuaiah Arunachal hel te'n an lo khah thu a sawi bawk. Nehru leh Lobin hi an tlanchhe hman a, mahse Kolai erawh khuaah a kir tawh loh thu leh a tukah a ruang an chhar thu a sawi bawk. He thil thlengah hian Behali police station-ah thubuai ziahluh a ni a, chhui zui mek a ni, a ti.
June 3-a thil thleng avanga lungawi lote chuan phuba lak nan June 5 khan Behali-ah Arunachal mi lirthei pakhat an hal a, lirtheia chuangte hian hliam an tawrh phah a ni, tiin Byaling chuan a sawi.
"District thuneitute chuan Assam police te nen ṭangrualin remna leh muanna a awm theih nan theihtawp an chhuah a, meeting pawh vawi eng emaw zat neih a ni tawh bawk. Remna a awm theih nan pawisawilote chu khawih an ni tur a ni lo," a ti.