‘Disturbed Area’-ah Nagaland puang

Sorkar laipui chuan Armed Forces (Special Powers) Act, 1958 Section 3 tlawhchhanin Nagaland state pumpui chu ram buai (disturbed area) ah a puang.

Thuchhuah a siamah sorkar laipui chuan Nagaland-ah hian boruak ṭha lo a inmung mek a ni tiin, armed force te chuan dan leh thupek lekkawh kawngah sorkar an pui thei dawn a ni, a ti.

Disturbed Area-a Nagaland a puan a nih tak vang hian armed force te chuan phalna (warrant) nei loin hel nia an rinhlelhte an man theih bakah an kap thei a, an duh hunah mi chenna-in an dap thei dawn bawk a ni.

Naga hel, Nationalist Socialist Council of Nagaland- Khaplang (NSCN-K) te'n June 4, Manipur Chandel district-a Indian Army convoy lambunnaa sipai 18 an kahhlum hnuah sorkar laipui chuan he thutlukna hi a siam a ni.

Ministry of Home Affairs (MHA) Joint Secretary Shambu Singh chuan thuchhuah a siamah, "Armed Forces (Special Powers) Act 1958, Section 3-in thuneihna a pek angin sorkar laipui chuan Nagaland state pum chu 'disturbed area'-ah kum khat chhung a puang a, June 30 aṭangin he dan hi hman ṭan nghal a ni," tiin a tarlang.

June 4-a NSCN (K) helte'n sipai 18 an kahhlum hnuah hian Indian Army chuan helte hi an tawmhimna Myanmar ramah hlawhtling taka an beih let thu an tarlang a, hel 15 chuang an kahhlum thu an tarlang bawk.

Hetihlai hian sorkar laipui chuan NSCN (K) hel pawl hi Unlawful Acti­vities Prevention Act, 1967 tlawhchhana dan pawna hnawl leh a tum thu a tarlang bawk a, hei hian helte chhui zui a tihawl­sam phah dawn a ni, a ti.

Hetihlai hian Nagaland Legislators Forum on Naga Political Issue-a Par­lia­mentary Working Committee (PWC) chuan Naga peace talk chinfelna tur bawhzui tura Prime Minister hmu tur, palai tirh a tum.

PWC aiawhte hian Prime Minister leh Union Home Minister hmuh an tum bakah Naga peace talk-a interlocutor biak an tum bawk.

PWC thuchhuak chuan NSCN (K) leh sorkar laipuiin inkahhai thuthlung an titawp chu pawi a tih thu tarlangin, inkahhai thuthlung chhunzawm a nih theih nan NSCN (K) chairman SS Khap­lang be turin, Naga Hoho leh Eastern Nagaland People’s Organisation te a ngen bawk.