Manipur-a ILP system phutnaah zirlai 1 a thi Tiam chin awm loin curfew puang nghal

Manipur-a inner line permit (ILP) system kalpui phuttu, Joint Committee on Inner Line Permit System (JCILPS) chuan Manipur Re­gulation of Visitors, Tenants and Migrant Workers Bill, 2015 duh lohna lantirin Ni­lai­ni khan Imphal-ah kawng­zawh a huaihawt leh.

Kawngzawhte hian State Assembly complex panin kawng an zawh a, session neih lai a nih avangin police te'n an lo dang a, an innawrnaah kawngzawhnaa tel, zirlai pakhat a thi a, midang 20 chuangin hliam an tuar.

JCILPS chuan Migrant Workers Bill, 2015 hi ṭhiah a, Manipur leilung fate humhalh nan dan khauh zawk siam an phut a ni.

Police kuta zirlai thi hi Sapam Robinhood Singh a ni a, Khurai Lairikyengbam Leikai venga mi a ni. Mittui tlakna hlo (tear gas shell)-in a hmaia a den fuh avangin hliam a tuar a, Raj Medicity damdawi-in intensive care unit (ICU)-a dah a nih hnuah tlai lam dar 4 vel khan a hliam tuar loin a thi a ni.

Zirlai thih avanga lung­awi lo, Ananda Singh Hig­her Secondary Academy zir­laite chuan Assembly complex leh Chief Minister chenna-in panin kawng an zawh leh nghal a, police inhnamhnawihte chu dan anga hrem an phut. Mahse kawngzawhte hi Imphal West Additional SP (Operations) Vikramjit leh Additional SP (Law and Order) S Ibomcha te telna police team te chuan kawng lakah an lo dang leh a, pawikhawihtu hrem tura an phut thu an auchhuahpui hnuah police te nen hian an innawr leh a, police te chuan pungkhawmte hnawhdarh nan tear gas shell ṭhahnem tak an kapchhuak leh bawk. Hmun danga thil thlengah zirlai pakhat thih avanga lungawilote chu Porompat police kawtah phungkhawmin, pawikhawihtu hrem an phut thu an tarlang bawk. Mipui pungkhawm hian anmahni dang tura lo kal, 4th Indian Reserve Batallion bus an tichhe bawk.

Nilaini chawhma lam khan Imphal West district school hrang hranga zirlaite chuan Assembly complex-a luh tumin complex hi hmun hrang hrang aṭangin an pankhawm a, police te'n an lo dang a ni. Chawhnu lamah TG Higher Secondary School zirlaite chu school campus aṭanga tlanchhuakin Assembly complex panin kawng an zawh ve leh a, police te nen hun rei tak chhung an innawr hnuah GP Women College zirlaite'n an lo zawm ve leh a, police te'n danna bang an siam chu paltlang tumin an nawr zui ve leh nghal. Zirlai pungkhawmte hnawhdarh nan police te chuan tear gas an kap a, a shell-in a den fuh zirlai ṭhenkhat chuan hliam an tawrh phah bawk.

Ibotonsana Girls Higher Secondary School leh John­stone Higher Secondary School zirlaite pawhin an school campus-a anmahni dangtu police te paltlangin Assembly complex panin kawng an zawh bawk a, police te'n an lo dan avangin Ima Keithel-a hmeichhe pawl nawrh huai­hawtte an zawm ve leh nghal.

Imphal-ah hian tiam chin awm loa curfew puan nghal a ni a, hetihlai hian JCILPS chuan ngawrh zawka lungawi lohna lantir zel an tum thu puangin, non-Manipuri te chu an boycott thu leh ni nga chhung pawnchhuah an phalsak loh thu an puang.

JCILPS convener in-charge Khomdram Ratan chuan non-Manipuri te chu ni nga chhung pawnchhuah an phalsak loh thu sawiin, ILP system kalpui an phut chu a muanawm zawnga kalpui turin a ngen nghal bawk.

Ratan chuan tear gas shell, smoke bomb leh rubber bullet vangin an thil phut chu an ṭhulh phah loh tur thu a sawi bawk.

Manipur-a ILP system kal­pui phutnaah hian MLA 57 chuan an ngaihdan an la sawi lo.