NE-in cancer enkawlna tam zawk mamawh

Hmarchhak bialah can­cer natna enkawlna a ṭhat loh avangin damlo ṭhahnem takin state dang an pan a ngai a, an inenkawlna senso a san phah hle.

Assam-a cancer natna veite kaihhnawih buaipuitu NGO pakhat, Deepshikha hotu, Debashis Sarma chuan hei hi hmarchhak bial harsatna lian tak a ni, tiin thingtlang leh khawpui huam chhungah cancer enkawlna hmunpui tam zawk hawn a pawimawh thu a sawi.

"Kum khatah hmarchhak aṭangin cancer natna vei 10,000 chuangin Mumbai an pan ṭhin a, chung zinga damlo 15-20 velin Tata Me­morial Hospital-a Deepshikha help desk an pan ṭhin," tiin Sarma chuan a sawi a, damlote chuan sum tam tak an sen a ngai a, mahse ṭhenkhat chuan senso tur an nei ṭhin lo a ni, a ti.

Sarma hi Mumbai As­­sam House-a Deputy Resident Commissioner a ni bawk a, damlote chuan radiation treatment la turin ni 15 chuangte an nghah a ngaih ṭhin thu a sawi bawk a, damlo enkawl tur an tam lutuk avangin Mumbai-a damdawi-inte dem theih an nih loh thu a sawi.

Cancer Care India chuan sorkar laipui leh hmarchhak state sorkarte chu cancer enkawlna damdawi-in tam zawk hawng tura ngen a tum thu Sarma chuan a sawi bawk.

Cancer Care India hma­lakna avangin sorkar laipui chuan cancer natna veite leh a enkawltu pakhat chu inenkawlna tura an veivah nan rel-ah a thlawnin chuan a phalsak thu Sarma chuan a sawi bawk a, Cancer Care India chuan Guwahati-ah office hawn a tum thu a sawi bawk.