Chi inthliarna do let nan dan siam dawn
India ram khawpui hrang hranga cheng, hmarchhak mite'n chi inthliarna lam hawia tihduhdah leh tharum thawhna an tawh ṭhin avangin sorkar laipui chuan pawikhawihtu hrem nan Indian Penal Code (IPC) section siam belh a tum.
Dan thar hnuaiah hian chi inthliarna lam hawia hmarchhak mite koh nawmnah chu bail theih loh pawikhawihna leh kum nga thleng lung-in tan theihna a ni ang.
Ministry of Home Affairs (MHA) chuan Delhi High Court hnena hriattirna a pekah IPC section 153C leh 509A dah belh a tum thu a tarlang a, he dan thar hi Inter-Ministerial consultation neih a nih hnuah Parliament-a pharh a nih tur thu a tarlang bawk.
Hmarchhak mite venhimna chungchang zirchiang tura sorkar laipuiin February 2014-a a ruat, MK Bezbaruah Committee chuan hmarchhak mite rawtna a siam a, heng zingah hian pawikhawihtu hremna tur IPC section dah belh rawtna hi a tel. Committee rawtnate hi MHA chuan a pawmsak a, hmarchhak mite him zawk nan dan lama ṭanpuina pe turte, hmarchhak mite tana police hma lakna thar siam leh hmarchhak chanchin zirlai bua telh tura hma lak nghal a ni.
IPC Section 153C hnuaiah hian chi inthliarna lam hawia mihring zahawmna tibawrhbang thei leh tharum thawhna thlen thei thuziak, ṭawngkam leh chhinchhiahna siamte chu bail phal loh hremna leh kum nga lung-in tang tura hrem theih a ni ang.
Section 509A hnuaiah eng hnam pawh, a hmusit zawnga chetzia lantir emaw ṭawng emaw chu kum thum thlenga lung-in tantir theih a nih bakah pawisa chawitir theih a ni ang.