Nagaland : CM-in ELEMENT Nagaland project hawng

Nagaland chief minister Neiphiu Rio chuan Chief Minister’s Secretariat, Nagaland Civil Secretariat, Kohima-ah Nilaini khan Enhancing Landscape and Ecosystem Management (ELEMENT) Nagaland Project a hawng. ELEMENT Nagaland Project hi World Bank-International Bank for Reconstruction and Development (IBRD) fund hmanga thawh tur a ni a, kum 5 chhungin district 16-a khua 225-ah thawh a ni dawn tih DIPR report chuan a tarlang.

Project-ah hian thil pali ngaih pawimawh a ni dawn a, chung zingah chuan natural resource hman ṭangkai theihna tur integrated landscape management tihchak pawh a tel.

Chief minister chuan project hmang hian hmeichhiate leh hnam hnuaihnung zawkte a pui thei dawn tih a sawi a, enterprise tihhmasawn kawngah an tel dawn a ni, a ti. Khawsak phunga harsatna awmte hmachhawn tura hmalakna a ni tih sawiin, mi zawng zawng huapzo leh ngelnghet taka hmasawnna hna thawh chhunzawm zelna tur a ni tih a sawi bawk.