JCILPS-in CM leh HM ban an phût

Manipur-a inner line permit system kalpui phuttu, Joint Committee on Inner Line Permit System (JCILPS) chuan Chief Minister Ibobi Singh leh Home Minister Gaikhangam te chu bang turin an phût.

JCILPS chuan state sorkar­in kumin March thlaa leilung fate humhalhna atana Manipur Regulation of Visitors, Tenants and Migrant Workers Bill, 2015 a pass chu Assembly session neih mekah hlih phutin dan khauh zawk siam turin an phût a ni. Nilainia kawng zawh an huaihawtnaa police te nen an innawrnaah zirlai pakhat a thi a, police te tear gas kahnaah mi 20 chuangin hliam an tawrh phah bawk.

JCILPS chuan chak zawka state sorkar nawr tumin, Non-Manipuri te lakah ni nga awh curfew a puang. Curfew hi July 13 aṭanga hman ṭan a ni ang.

Hetihlai hian state sorkar chuan Nilaini aṭang khan CrPC section 14-a sub-section 2 tlawhchhanin tiam chin awm loin curfew a puang bawk.

JCILPS activist te hian Ningani pawh khan Imphal khawpuiah nasa takin an lungawi lohna leh an thil phut an auchhuahpui leh a, Chief Minister leh Home Minister bakah MLA te pawh bang vek tura an phût thu an tarlang.