NE-a ADC te'n Ministry hran siam phut

Hmarchhak biala Auto­nomous District Councils (ADC) ṭangrual pawl, Forum of Councils Under Sixth Schedule (FOCUSS) chuan Union Ministry for the Dis­trict Councils siam an phut.

FOCUSS-ah hian Khasi Hills ADC, Jaintia Hills ADC leh Garo Hills ADC te bakah Bodo Territorial Council, North Cachar ADC leh Mizorama ADC pathum te an tel a, tun hnaia Shillong-a meeting an neih ṭumin he thutlukna hi siam a ni.

KHADC Chief Executive Member PN Syiem chuan funding chungchanga ADC te'n harsatna an tawh ṭhin chu Union Ministry for ADC din a nih chuan a ziaawm phah a beisei thu a sawi.

ADC Forum chuan an thil phutte sorkar laipuia thlen thuai an tum thu tarlangin, Union Home Minister hmuh an tum thu an tarlang a, sorkar laipuiin India danpuia Sixth Schedule siamṭhatna (amendment) atana draft a buatsaihah ADC te ngaihdan lak a nih loh avanga an lung­awi loh thu an tarlang bawk.

"Sixth Schedule amend­ment draft buatsaihnaah ADC te ngaihdan lak a nih loh avangin Union Home Mi­nistry-ah zawhfiah tur tam tak a awm a ni," tiin Syiem chuan a sawi bawk.