Kar thum chhungin bandh vawi 15 huaihawt hman

Gauhati High Court chuan kum nga kalta khan bandh leh kawngpui danchah chu dan bawhchhiatnaah a lo puang tawh a, a huaihawtte chungah action la turin Assam sorkar a lo hriattir tawh bawk.

Hetihlai hian Assam-a bandh huai­hawt leh kawngpui danchah hian ziawm lam a pan chuang lo a, tun hnai khan kar thum chhungah vawi 15 bandh huaihawt a ni.

August 2012 khan state sorkar pawhin kum khat chhung bandh huaihawt a lo khap tawh bawk a, kum 2013-ah Assam Prevention of Unconstitutional Bandh Bill 2013 a pass leh a ni. He dan hmang hian bandh huaihawttute chu kum hnih lung-in tantir theih an nih bakah bandh an huaihawt chhunga ni khat zelah cheng 10,000 a chawitir theih bawk. Kawngpui danchah huaihawtte chu kum khat chhung tantir theih an nih bakah an thil tihchhiatte chawitir theih an ni bawk a, mahse he dan tlawhchhana dan bawhchhetu hrem erawh an awm hriat a ni lo.

Thawhlehni khan Bongai­gaon, Barpeta, Sonitpur, Lakhimpur, Dhemaji, Gola­ghat leh Sivasagar district-ah hnam peng paruk ṭangrualte chuan scheduled tribe (ST) status phutin darkar 12 awh bandh huaihawt a ni a, nunphung a khaihlak phah hle. Kar kalta khan Nagaon dis­trict-a bandh huaihawttute chuan hmeichhe pakhat damdawi-ina kal tur chu kut an thlak tawh bawk.

Bandh leh kawngpui dan­chah huai­hawt chungchanga state sorkar leh High Court thuchhuak hian zawm a hlawh lo hle tiin Assam journalist Mrinal Talukdar chuan a sawi a, state sorkar chu mipuite nungphung khaihlak lo tura a dan siamte lekkawh zo loah a puh bawk.

Bandh huaihawt avanga sum hloh zat hi state sorkar chuan a chhut zui ngai lo a, mahse Federation of Commerce and Industries in the North Eastern Region-in kum 2005-a an chhut danah hemi kum chhung hian cheng vaibelchhe 41.14 vel Assam-in a hloh a ti.